اسلام آباد۔14نومبر(اے پی پی) وفاقی وزیر منصوبہ بندی ترقی واصلاحات وخصوصی اقدامات پروفیسر احسن اقبال آکھیے ساݙی نسل تختی توں فائیو جی دا سفر طے کر تے ناممکن کوں ممکن کرݙکھائے ، اے نالج تے انوویشن دا دور اے، جیں اچ حیرت انگیز تبدیلیاں تھئن تے پاکستان دے نینگر انٹرپرینیور اپݨی صلاحیتاں دا لوہا منویندے پئن ۔ ویمن انٹرپرینیورشپ کانفرنس “ویکون 2024” توں خطاب کریندے احسن اقبال نینگر چھوہریں دی کامیابیاں دا ذکر کریندے آکھیے او جدید شعبیں اچ بھرپور انداز نال اڳوں ودھدیاں پئن تے دنیا دی ممتاز یونیورسٹیاں اچ آپݨی صلاحیتاں دا لوہا منویندیاں پئں ۔ انھاں نارووال جیھے پسماندہ علاقے اچ یونیورسٹی دی ترقی تے طالبیں دی ودھدی تعداد تے ماݨ کیتے ۔وزیر منصوبہ بندی پاکستان سانڳے پنج نکاتی ایجنڈا، “فائیو ایز ماڈل” دا ذکر کریندے ݙسائے ایں فریم ورک اچ برآمدات، ڈیجیٹل پاکستان، گرین توانائی، ماحولیاتی تحفظ، اتے ترقی دے برابر دے موقع ودھاوݨ دے اقدامات شامل ہن ۔ انھاں آکھیے پاکستان کوں آپݨے نینگر تے تریمتاں کوں بااختیار بݨاوݨ دی لوڑھ اے تے اساکوں ہر شعبے اچ تریمتاں دی شمولیت سانڳے خصوصی پروگرام شروع کرݨے چاہیدن ۔احسن اقبال ترقی یافتہ ملکاں دی مثال ݙیندے آکھیے ہر ملک دیاں تریمتاں دی شمولیت دے ذریعے ترقی دیاں منزلاں پار کیتن ۔ انھاں ٻاہرے ڈگری گھنݨ دے باوجود پاکستان اچ رہ تے کم کرݨ دی اہمیت تے زور ݙتا تے آکھیے جیڑھا آپݨے ملک سانڳے جذبہ رکھیندے ، او اتھاں رہ تے ہی آپݨا کردار نبھسی ، پاکستان دی سٹاک مارکیٹ 94 ہزار انڈیکس پار کر ڳھدے جیڑھا ملکی معیشت دے استحکام کوں ظاہر کریندے ۔ وزیر منصوبہ بندی آکھیے 2013 میں ملک کوں بحران توں کڈھݨ دا چیلنج قبول کیتا تے کامیابی ڳھدی ، مگر 2018 اچ یوٹرن دیاں پالیسیاں ترقی کوں پچھوں سٹ ݙتا ۔ دوست ملکاں تے الزام تے بے بنیاد ڳالھیں ساݙے تعلقات کوں ضیان پڄائے ، انھاں آکھیے ملک کوں ھک واری ول اپریل 2022 اچ بحران دا سامݨا کرݨا پیا، مگر امن، سیاسی استحکام، پالیسیاں دے تسلسل اتے اصلاحات دے ذریعے ترقی ممکن اے۔ایں جذبے نال محنت جاری رکھی ڳئی تے سیاسی استحکام قائم رہیا تاں اڳلے کجھ سالاں اچ پاکستان ترقی دیاں منزلاں پار کریسی۔
